Bashkimi Europian po i kërkon hapa shtesë Kosovës, me qëllim heqjen e masave ndëshkuese ndaj saj. BE-ja nuk ka bërë të ditur se cilat janë hapat shtesë, por Qeveria ‘Kurti’ ka deklaruar se Kosova ka plotësuar të gjitha kërkesat e dakordimit të Bratislavës për deeskalimin e situatës në veri dhe se një gjë e tillë do të ishte e mjaftueshme që masat të largohen. Po ashtu, shprehen se prej qershorit të këtij viti ka një raport të përfaqësuesit të lartë BE-së Joseph Borrell në të cilin kërkohet që masat ndaj Kosovës të largohen. Hapat shtesë për heqjen e masave i përmendi dhe presidentja e Komisionit Evropian, Ursula von der Leyen, të shtunën gjatë vizitës në Prishtinë e cila tha se veprimet që ka bërë Kosova lidhur me CEFTA-n kanë qenë pozitive, por që nevojiten hapa të mëtejmë në mënyrë që të arrihet te heqja e masave.