Qindra zjarrfikës luftuan për të tretën ditë me radhë për të vendosur nën kontroll zjarrin në pyllin e gadishullit të Peloponezit të Greqisë që vrau dy persona, thanë autoritetet greke. Zjarri ka djegur deri në 5,000 hektarë tokë pyjore dhe bujqësore, tha në një konferencë shtypi ministri i mbrojtjes civile Vassilis Kikilias. Mbi 400 zjarrfikës të mbështetur nga 100 makina zjarrfikëse dhe 21 avionë luftuan me zjarrin gjatë ditës por pa mundur ta vendosin nën kontroll. “Është jashtëzakonisht e vështirë për forcat tona tokësore dhe komandot e zjarrit të hyjnë thellë në këto pyje dhe të merren me zjarrin”, tha ministri. Zjarri, që shpërtheu të dielën në një luginë pranë bregut verior të Peloponezit, detyroi evakuimin e një duzinë fshatrash. Zyrtarët "nuk prisnin" që të përballeshin me zjarret në këtë pikë të sezonit të vjeshtës, tha Kikilias.