Përhapja masive e infeksioneve me variantin Omicron ka detyruar shtetin grek të shtyjë masat aktuale anticovid deri më 24 janar. Masat aktuale, Greqia I kishte lënë në fuqi deri më 10 janar, por me shtimin e rasteve pas konfirmimit të variantit Omicron në vend, siç duket masat shtrënguese do të vijojnë të jenë në fuqi. Në një postim në Facebook, Ministria për Evropën dhe Punët e Jashtme kujton se të gjithë shqiptarët që udhëtojnë drejt Greqisë, pavarësisht se janë të vaksinuar ose kanë qenë të diagnostikuar me COVID-19, janë të detyruar të paraqesin test negativ PCR ose test antigjenik të kryer brenda 24 orëve. Të gjithë udhëtarët që hyjnë në territorin e Republikës së Greqisë, duhet të plotësojnë formularin elektronik Passenger LocatorForm me të dhënat e tyre të kontaktit në Greqi, përpara mbërritjes. Masa vlen për të rriturit dhe fëmijët mbi 5 vjeç, pavarësisht nga vaksinimi. Pikat kufitare të Kakavisë, Kapshticës dhe Qafbotës funksionojnë gjatë 24 orëve. Pika kufitare e Tre Urave funksionon nga ora 8 e mëngjesit deri në 8 të mbrëmjes.