Një grabitje nën ushtrimin e dhunës është shënuar në fshatin Spiten në Lezhë, mesnatën e 23 majit. Mësohet se në banesën e çiftit Doçi janë futur persona të paidentifikueshëm, të maskuar dhe armatosur me armë tip kallashnikov. Grabitësit janë ndeshur me rezistencën e kryfamiljarit dhe bashkëshortes së tij, 47 vjeçare. Si pasojë personat e maskuar kanë ushtruar dhunë nën kërcënimin edhe të një arme zjarri tip kallashnikov, mbi Gjergj dhe Vitore Doçin. Personat e maskuar kanë vjedhur një sasi të konsiderueshme parash dhe dy aparate celularësh dhe më pas janë larguar nga banesa. Mësohet se çifti Doçi janë jo vetëm të tronditur psikologjikisht, por gjithashtu kanë marrë edhe plagë në pjesë të caktuara të trupit për të cilat po marrin ndihmën mjekësore pranë spitalit të Lezhës. Në njoftimin zyrtar të policisë së shtetit, autoritetet bëjnë me dije se personat e maskuar kanë lënë pas prova në banesë, të cilat do të ndihmojnë në zbardhjen e plotë të çështjes si dhe në identifikimin e grabitësve. Ndërkohë janë shoqëruar 10 persona në polici, të cilët dyshohet që mund të kenë informacion mbi hajdutët. Uniformat blu po punojnë për hetimin e plotë të ngjarjes teksa mësohet se janë sekuestruar edhe pamjet filmike të kamerave të sigurisë të ambjenteve rreth shtëpisë ku ndodhi ngjarja. Pritet që autoritetet policore të zbardhin detaje të reja në vijim.