Dy persona u arrestuan të martën, pasi një burrë goditi me shpullë presidentin francez Emanuel Macron, gjatë një ecjeje dhe takimi me njerëzit në rajonin e Drome, në Francën juglindore. Në një video të publikuar në Tëitter duket një burrë me bluzë të gjelbër, syze dhe maskë mbrojtëse, që thërret “poshtë Macronia” dhe më pas godet me shpullë presidentin. Menjëherë ndërhynë truprojat e Macron, të cilët e tërhoqën dhe shtrinë përtokë burrin, dhe në të njëjtën kohë larguan presidentin. Politikanët e kanë denoncuar me shpejtësi incidentin. Kryeministri Jean Castex i tha Asamblesë Kombëtare pak pas incidentit se ndërsa demokracia nënkuptonte debat dhe kundërshti legjitime, "ajo në asnjë rast nuk duhet të nënkuptojë dhunë, agresion verbal dhe aq më pak sulm fizik". Udhëheqësi i ekstremit të majtë Jean-Luc Mélenchon shprehu në Twitter "solidaritetin e tij me Presidentin". Presidenti Macron po kryen një tur në Francë dhe sapo kishte vizituar një shkollë hotelerie në Tain-l'Hermitage. Vizita e presidentit vjen në prag të një hapi të madh për baret dhe restorantet franceze, të cilat do të rihapin ambjentet e brendshme pas shtatë muajsh mbylljeje. Gjithashtu ora policore do të shtyhet të mërkurën nga ora 21:00 deri në 23:00.