Ministria ruse e mbrojtjes ka bërë të ditur tashmë se afro 1 mijë ushtarë ukrainas të bllokuar prej javësh në metalurgjikun e Azovstalit në Mariupol, janë dorëzuar. Ndërsa brenda impiantit besohet se gjenden edhe disa qindra luftëtarë, mes të cilëve komandantët me grada të larta. Sidoqoftë, ajo që shqetëson më shumë tani, është fati i të dorëzuarve. Sipas disa burimeve kremlini ka garantuar trajtim në pajtim me standartet ndërkombëtare, por brenda dumës ruse, ka nga ata që kërkojnë gjykim për terrorizëm e madje edhe thirrje për ndëshkimin kapital. Pas ndalimit të luftimeve në Azovstal, në ditën e 82 të luftës, Shtabi i ushtrisë ukrainase tha se garnizoni i Mariupolit e ka kryer misionin e tij, duke ndaluar planin e rusëve për të pushtuar Zaporizhian e duke lejuar kështu ushtrinë ukrainase të riorganizohet. Më pas, i kërkoi komandantëve të përqendroheshin tek objektivi i shpëtimit të jetëve të atyre që kanë mbetur në metalurgjik. Dhe kërkesa është pranuar nga shefi i Bataljonit Azov, Denis Prokopenko. Zyrtarët ukrainas thonë se pasi të jetë stabilizuar situata, ata do të shkëmbehen me të burgosur rusë lufte. Por kjo zgjidhje për momentin duket e vështirë. Prokurori i përgjithshëm rus i ka kërkuar gjykatës së lartë ti shpallë luftëtarët e Azovstalit, organizatë terroriste.