Kosova ka përmbushur kriteret për liberalizimin e vizave të përcaktuara nga Bashkimi Evropian, por qytetarët e saj ende nuk mund të lëvizin pa viza për në vendet e BE-së. Gjermania e cila kishte presidencën gjatë muajve korrik-dhjetor të vitit 2020, vazhdon ta mbështesë procesin e liberalizimit në bazë të kritereve të plotësuara. Zyra për Informim e Qeverisë gjermane tha se Gjermania e kishte vënë këtë temë në agjendën e organeve përgjegjëse të BE, por nuk ishte arritur shumica e votave të shteteve anëtare për t’ia hequr vizat Kosovës. Më tej në njoftim thuhet se Qeveria Federale i mbështet fuqishëm negociatat Kosovë-Serbi. Sipas tyre rezultati përfundimtar i negociatave të udhëhequra nga i dërguari Special i BE, Miroslav Lajçak, dhe të mbikëqyrura nga shefi për Politikë të Jashtme dhe Siguri të BE-së, Josep Borrel, duhet të jetë një marrëveshje gjithëpërfshirëse dhe ligjërisht e detyrueshme për të dyja palët. Nga Zyra për Informim e ekzekutivit gjerman u tha se kjo marrëveshje është një nga parakushtet për pranimin e Serbisë në BE.