Të paktën gjashtë persona kanë humbur jetën pasi një nëndetëse me turistë u mbyt pranë brigjeve të Egjiptit. Nëntë persona të tjerë janë të lënduar, katër prej tyre në gjendje kritike, në fatkeqësinë që ndodhi vetëm një kilometër larg vendpushimit të Hurghadës mëngjesin e të enjtes. Nëndetësja turistike, e quajtur Sindbad, mbante rreth 44 pasagjerë, përfshirë fëmijë, në momentin e fundosjes të enjten. Skuadrat e shpëtimit deri më tani kanë arritur të shpëtojnë 29 persona, sipas një deklarate të zyrtarëve lokalë. Ambasada ruse në Kajro ka njoftuar se katër shtetas rusë janë mes viktimave pas incidentit. Drejtoria e Sigurisë së Detit të Kuq mori një raport për fundosjen e nëndetëses turistike, afër portit dhe përballë Hotelit Sindbad Club. Të gjitha instancat janë vendosur në gatishmëri maksimale pas katastrofës. Rreth 21 ambulanca janë dërguar në vendin e ngjarjes dhe kanë transportuar të plagosurit në spitalet lokale. Sipas disa raporteve, turistët ishin "të kombësive të ndryshme", por në një postim në Facebook, ambasada ruse në Egjipt pretendoi se të gjithë turistët ishin rusë. Kanali rus në Telegram Baza raportoi se një fëmijë ishte mes viktimave, megjithëse kjo nuk është konfirmuar. Ai shtoi gjithashtu se nëndetësja ishte përplasur me një shkëmb dhe kishte pësuar një carje, gjë që bëri që të fundosej. Nëndetësja ishte nisur nga një nga plazhet në zonën e shëtitores turistike. Turistët ishin nisur për të parë shkëmbinjtë koralorë të Egjiptit dhe peshqit tropikalë. Nëndetësja kryente udhëtime turistike në Hugarda prej vitesh. Deti i Kuq, i njohur për shkëmbinjtë e tij koralorë dhe jetën e larmishme marine, është një qendër kryesore për industrinë e turizmit të Egjiptit, e cila luan një rol kritik në ekonominë e vendit. Në nëntor, një anije turistësh u mbyt në brigjet e Detit të Kuq, duke vrarë katër persona.