Turqia po shkrumbohet nga zjarre të reja ndërkohë që më shumë se 1700 persona janë detyruar të braktisin shtëpitë e tyre. Një zjarrfikës raportohet të ketë humbur jetën, ndërsa luftonte me flakët, në mesin e një numri zjarresh vdekjeprurëse që kanë përfshirë vendin. Banorët në Bursa u paralajmëruan për zjarre të rrezikshme mëngjesin e të dielës. Flakët shpërthyen në zonat malore të pyllëzuara në Turqinë veriperëndimore, ndërsa u përhapën me shpejtësi në të gjithë rajonin. Zyra e guvernatorit të Bursës tha se 1,765 persona ishin evakuuar në nga fshatrat në verilindje zonës. Të paktën 76 zjarre u regjistruan në të gjithë vendin gjatë 24 orëve të fundit, me vatra të mëdha ende aktive në Bursa, Karabuk, Usak dhe Kahramanmaras. Më shumë se 1,100 zjarrfikës janë thirrur për të ndihmuar në luftën me flakët dhe për shpëtimin e njerëzve të bllokuar. Për shkak të zjarreve në pyjet përreth, të dielën u mbyll autostrada që lidh bursën me kryeqytetin e vendit, Ankara. Flakët kanë djegur me mijëra hektarë tokë rreth qytetit deri më tani. Zyrtarët lokalë e përshkruan situatën si apokaliptike. Zjarret po përhapen nga erërat e forta që po i shtyjnë flakët më afër zonave të banuara. Turqia është goditur nga një numër zjarresh në javët e fundit. Presidenti Rexhep Tajip Erdogan tha të premten se vendi po përballet me "një katastrofë vërtet të madhe" pasi dhjetëra rajone janë shkatërruar. Zjarre të reja shpërthyen në bregdetin mesdhetar të Turqisë të premten, ndërsa qeveria shpalli dy provinca perëndimore në vend si "zona katastrofe". Ndërkohë edhe në Qipro banorët po përballen me zjarret më të rënda në 50 vitet e fundit mes një vale të nxehti që ka përfshirë të gjithë ishullin dhe me mërkurin në termometër që ka kaluar 44 gradët celcius.