Fëmijët luajnë futboll mes radhëve të qindra tendave bezhë, rrobat e lara thahen në gardhe. Pak më tej, disa persona presin radhën për në tualet. Ramsteini, në gjermaninë perëndimore, baza më e madhe amerikane në Evropë, është shndërruar në një kamp gjigand refugjatësh, plot me njerëz që janë marrë nga afganistani nga forcat ajrore amerikane. Për disa ditë, ata që janë larguar nga vendi, presin në bazë që të transferohen në një destinacion tjetër. Ata janë afganë që kanë punuar me forcat amerikane, ose që konsiderohen vulnerabël pasi talebanët morën pushtetin. Për rreth 200 prej tyre, që ndodhen në pistë, poshtë një Boeingu 767-300, që do ti dërgojë përtej atlantikut, ndalesa në bazë ka përfunduar. Disa mbulohen me batanije për tu mbrojtur nga i ftohti i hershëm i vjeshtës së parakohëshme gjermane. Të tjerë, mbajnë në krahë fëmijët e mitur. Për këta refugjatë, kjo është një nga fazat e fundit të një eksodi nga kabuli, që në pjesën më të madhe i dërgon ata fillimisht në Katar apo në Kuvajt, që përdoren si baza tranziti nga amerikanët në operacionin e tyre të evakuimit. Ramsteini u kthye brenda një nate të vetme në një qendër pritjeje për deri në 17 mijë persona, me tenda dhe ambjente të tjera të nevojshme. Pas mbërritjes në bazë, është i detyrueshëm ekzaminimi mjekësor për të gjithë, burra, gra dhe fëmijë, që shpesh kanë me vete vetëm një cantë shpine. Shumëkush mbërrin i dehidratuar dhe ushtarët janë të gatshëm në ndihmë të tyre. “Për ne, është cështje nderi”, thotë majori Ralf Hechler, “ata kanë qëndruar përkrah nesh, kanë luftuar me ne, dhe tani që kanë nevojë, duhet ti ndihmojmë”.