Zëvendës Ndihmës Sekretarit amerikan të Shtetit për Evropën dhe Euroazinë dhe njëkohësisht i dërguar i posaçëm për Ballkanin Perëndimor, Gabriel Escobar mbërriti paraditen e të martës në Tiranë, në kuadër të një vizite dy ditore. Takimin e parë në Tiranë, Escobar e mbajti me kryeministrin Edi Rama, ku diskutoi për rëndësinë e procesit zgjedhor në Shqipëri dhe bëri apel për zbatimin e rekomandimeve në OSBE-ODIHR. Gjithashtu Escobar përsëriti thirrjen që liderët politikë të nxjerrin në garë kandidatura që përmbushin kërkesat e ligjit dhe pritshmëritë e qytetarëve shqiptarë për integritet të lartë. Pas takimit me Ramën, Escobar u prit nga presidenti i Republikës, Bajram Begaj, ku u diskutua roli i Shteteve të Bashkuara të Amerikës në garantimin e paqes në Ballkanin Perëndimor, lufta në Ukrainë dhe siguria kibernetike në Shqipëri.