Një operacion shpëtimi po zhvillohet pranë Miami Beach pasi një ndërtesë u shemb në orët e para të këtij mëngjesi. Ndërtesa përballë oqeanit, një kompleks 12-katësh apartamentesh, i quajtur Champlain Towers South, është shembur pjesërisht, kanë konfirmuar shërbimet zjarrfikëse. Fqinjët thonë se ndërtesa ishte pothuaj e gjitha e banuar, por nuk dihet se çfarë bëri që kulla, e ndërtuar në 1981 afër rrugës 88th dhe Collins Avenue në Surfside, Florida, të shembet. Ka mundësi që shumë njerëz të kenë vdekur ose të kenë mbetur të bllokuar nën rrënoja, ndërsa po zhvillohej një operacion kërkim-shpëtimi nga autoritetet lokale. Një dëshmitar, i cili ishte në një ndërtesë fqinje, tha se shembja ndodhi rreth orës 1.20 të mëngjesit, dhe ngjante si një tornado ose tërmet. Pamjet tronditëse tregojnë zjarrfikësit duke tërhequr një djalë nga rrënojat, ndërsa operacioni i shpëtimit vazhdon. Të paktën dy persona dhe një zjarrfikës janë dërguar në spital por zyrtarët nuk kanë konfirmuar ende ndonjë detaj në lidhje me viktimat e mundshme. Fotografitë dhe videot tronditëse nga vendi i ngjarjes sugjerojnë që një pjesë e madhe e kullës është shembur, duke lënë pas grumbuj të stërmadh mbeturinash në skaj të Collins Avenue. Dëshmitarët pretendojnë se kanë dëgjuar vazhdimisht njerëz që ulërinin nën rrënoja.