Dhjetëra anije transporti të ngarkuara me mallra jetësore, mbeten të bllokuara në të dyja skajet e kanalit të Suezit ndërkohë që vazhdojnë përpjekjet për të larguar anijen 224 mijë tonëshe që po bllokon një nga rrugët ujore më të frekuentuara në botë. Përpjekjet për të larguar Ever Given, rinisën të enjten, me pesë rimorkiatorë që po punojnë për ta tërhequr atë në ujëra më të thellë. Anija e mallrave, që është e gjatë aq sa Empire State Building, ngeci në rërë të martën pasi u devijua nga një erë e fortë dhe një stuhi rëre që shkaktoi shikueshmëri të ulët dhe kushte të vështira lundrimi. Anija gjigande, 400 metra e gjatë dhe 59 metra e gjerë, vazhdon të bllokojë tranzitin në të dyja drejtimet e kanalit. Kompania më e madhe në botë e anijeve të transportit, Maersk, tha se shtatë nga anijet e saj ishin prekur. Katër anije janë të ndalura në kanal ndërsa pjesa tjetër presin të hyjnë në të, tha kompania daneze. Shërbimet e marinës lëshuan një deklaratë në të cilën nënvizonin se përpjekjet për të hapur kanalin vazhdonin por era dhe përmasat e mëdha të saj e bënin operacionin shumë të vështirë. Rreth 30 për qind e vëllimit të transportit me anije në botë kalon përmes kanalit të suezit 193 kilometra të gjatë, cdo ditë. Dhe rreth 12 përqind e tregtisë totale globale të të gjitha mallrave po ashtu. Ekspertët e lundrimit thonë se nëse situata nuk do të zgjidhet brenda 24-48 orëve të ardhshme, disa kompani do të detyrohen ti kthejnë anijet e tyre në trajektore të tjera përreth cepit jugor të afrikës, cka do ta zgjaste udhëtimin e tyre me të paktën një javë.