Këngëtarja me famë botërore e me origjinë kosovare Dua Lipa, ka marrë nënshtetësinë e Kosovës, duke u pritur në një takim të veçantë të organizuar nga Presidentja Vjosa Osmani. Lajmi është bërë I ditur nga vetë presidentja Osmani në një postim në rrjetet sociale ku vlerëson figurën e këngëtares, dhe kontributin e saj për Kosovën. Përmes një postimi në Facebook, Osmani u shpreh se ky është një ‘nder i veçantë’ për vendin, duke theksuar se është një nga personalitetet më të rëndësishme kulturore dhe artistike në historinë e Kosovës. “Mirë se erdhe në shtëpi, Dua”, ka shkruar Presidentja Vjosa Osmani. “Ajo ka qenë dhe vazhdon të jetë një nga zërat më të fuqishëm në skenat më të mëdha të botës, duke bërë histori me të arriturat e saj dhe duke u shndërruar në inspirim për miliona njerëz anekënd globit”, thekson më tej presidentja. Osmani vlerësoi kontributin e Lipës në promovimin e Kosovës ndërkombëtarisht, në fuqizimin e të rinjve dhe në përkrahjen e artit vendor.