Fluturimet në Aeroportin e Mynihut u ndërprenë përkohësisht mëngjesin e së shtunës pas raportimeve për praninë e mundshme të një droni pranë zonës së operimit. Autoritetet aeroportuale pezulluan lëvizjet ajrore për arsye sigurie dhe nisën verifikimet për objektin e dyshimtë. Sipas mediave gjermane, përfshirë Focus Online dhe Bild, aktiviteti ajror rifilloi pas pak kohësh dhe operimet po i kthehen gradualisht normalitetit. Të dhënat në faqen zyrtare të aeroportit treguan se disa fluturime të planifikuara deri rreth orës 10:00 me orën lokale u vonuan ose u anuluan, ndërsa të tjera u zhvilluan sipas planit. Deri tani, aeroporti dhe policia nuk kanë dhënë një reagim zyrtar për incidentin. Autoritetet pritet të sqarojnë nëse bëhej fjalë për një dron të konfirmuar apo vetëm për një alarm sigurie.