Udhëheqësi i Koresë së Veriut Kim Jong Un tha se vendi i tij do të arrinte fitore në betejat "anti-imperialiste dhe anti-amerikane", ndërsa vendi shënoi përvjetorin e armëpushimit të Luftës Koreane, raportuan mediat shtetërore të dielën. Kim "pohoi se populli ynë, me siguri do të arrijë kauzën e madhe të ndërtimit të një vendi të pasur, me një ushtri të fortë, dhe do të dalë fitues në përballjen anti-imperialiste dhe anti-amerikane", tha agjencia shtetërore e lajmeve KCNA, duke iu referuar vizitës së Kim Jong un në një muze lufte një ditë më parë. Koreja e Veriut nënshkroi një marrëveshje armëpushimi me Shtetet e Bashkuara dhe Kinën më 27 korrik 1953, duke i dhënë fund luftës trevjeçare me jugun. Gjeneralët amerikanë nënshkruan marrëveshjen në cilësinë e përfaqësuesit të forcave të Kombeve të Bashkuara që mbështetën Korenë e Jugut. Koreja e Veriut e quan 27 korrikun "Dita e Fitores" edhe pse armëpushimi coi në një kufi që ndante gadishullin Korean në mes dhe rivendoste ekuilibrin pasi të dy palët kishin bërë përparime të mëdha para dhe mbrapa gjatë luftës. Koreja e Jugut nuk e shënon këtë ditë me ndonjë ngjarje të madhe. Kim Jong un ndërkohë vizitoi edhe memorialet që nderojnë veteranët e luftës së viteve 1950-53, përfshirë Kullën e Miqësisë që përkujton ushtarët e Ushtrisë Çlirimtare Popullore Kineze që luftuan me koreano-veriorët, dhe u takua me ushtarë në një regjiment artilerie për të festuar ditën e fitores, tha agjencia shtetërore e lajmeve KCNA.