Ndryshimet legjislative bënë që automjetet t’i nënshtohen kontrolleve teknike një herë në dy vite. Drejtoria e Përgjithshme e Shërbimeve dhe Transportit ka publikuar të gjitha detajet lidhur me kolaudimin e automjeteve. Sipas njoftimit zyrtar kolaudimi i automjeteve rifillon në datën 31 maj. Më pas gjithë procedura e kolaudimit është e mirëorganizuar sipas një kalendari, në të cilin datat fillestare i zënë kategoritë më prioritare për transportin rrugor. Mjetet e para që do të marrin shërbimin e kontrollit teknik janë kamionët, rimorkiot dhe tërheqësit të cilëve iu ka skaduar Certifikata e mëparshme e Kontrollit Teknik si dhe të gjitha mjetet në pronësi të institucioneve shtetërore. Drejtoria e Përgjithshme e Shërbimeve dhe Transportit do të publikojë një tjetër datë për të vijuar me të gjitha mjetet e përdorura të regjistruara për herë të parë në Republikën e Shqipërisë nga data 1 janar 2021 të cilat nuk janë pajisur ndonjëherë me Certifikatë të Kontrollit Teknik dhe mjetet të cilave u ka përfunduar Certifikata e Kontrollit Teknik deri në datën 23 dhjetor 2020 ose nuk e kanë kaluar Kontrollin Teknik. Më pas do të marrin shërbimin e kontrollit teknik edhe mjete të tjera rrugore për transport mallrash të rrezikshme, mjete rrugore për transportin e udhëtarëve ndërkombëtar dhe ndërqytetës, taksitë, autoshkollat dhe mjetet e tjera në pronësi të subjekteve. Gjatë periudhës që automjetet presin të afrojë data për kolaudim nuk do të kenë asnjë penalitet nga organet e kontrollit në rrugë. Megjithatë të gjithë drejtuesit e mjeteve duhet të sigurohen , të kenë me vete Certifikatën e Kontrollit Teknik të lëshuar në vitin 2020, si dhe vërtetimin e pagesës së taksave vjetore brenda afatit të përcaktuar: