Varianti Delta, i njohur edhe si varianti indian i koronavirusit, vlerësohet se është 40 % më i transmetueshëm sesa varianti i ashtuquajtur britanik, tha të dielën ministri i Shëndetësisë së Mbretërisë së Bashkuar. Por, ministri Matt Hancock tha se ata që kanë marrë të dyja dozat e vaksinës, me gjasë janë njësoj të mbrojtur nga cilido variant i virusit. “Kjo shifër, prej rreth 40 % më tepër transmetueshmëri, është realisht e dhëna e fundit që kam marrë”, tha ai. Varianti Delta tashmë është varianti dominues në Mbretërinë e Bashkuar, ka bërë të ditur Zyra e Shëndetit Publik në Angli. Në janar, për shkak të përhapjes së variantit britanik, që njihet edhe si varianti Alfa, Mbretëria e Bashkuar vendosi masa të izolimit mbarëkombëtar. Hancock tha se shifra prej 40 % vjen pas analizave që ka kryer grupi i shkencëtarëve, që këshillon Qeverinë britanike. Përhapja e variantit indian të koronavirusit, ka rritur shqetësimet në Britani, ku është parashikuar që më 21 qershor të hiqen masat kufizuese kundër pandemisë. Hancock e pranoi se qeveria ende nuk ka marrë një vendin përfundimtar për heqjen e kufizimeve, për shkak të variantit indian. “Ne do t’i shikojmë të dhënat edhe për një javë dhe më pas do të marrim vendimin”, tha ai të dielën, duke shtuar se qeveria është e hapur ndaj mundësisë që ta shtyjë afatin. Megjithatë ai tha se dy dozat e vaksinës ofrojnë mbrojtje ndaj variantit Delta. Sipas të dhënave, Mbretëria e Bashkuar deri më tani ka vaksinuar mbi 27 milionë persona me dy doza të vaksinës, ku mbi 50 % janë të rritur, dhe mbi 40 milionë persona me një dozë të vaksinës.