Ish kryeministri italian, Silvio Berluskoni, do të mundet shumë shpejt të dalë nga spitali ku është shtruar të hënën e kaluar për një kontroll rutinë. Berluskoni është aktualisht i shtruar në spitalin San Rafaele në milano për monitorim rutinë klinik dhe për vlerësimin e një terapie aktuale – thanë zyrtarët e partisë së tij Forza Italia. Para se të dërgohej në spitalin San Raffaele, 84 vjecari, manjat i medias, po qëndronte në shtëpinë e tij në Arcore, afër Milanos. Ai duhet tani sipas zyrtarëve të pushojë për ta rimarrë veten. Berluskoni nuk mundi të merrte pjesë në një seancë gjyqësore në Milano mëngjesin e të mërkurës, për një rast gjyqësor në të cilin është i përfshirë. Janarin e kaluar, Berluskoni u shtrua në spital në Monaco për probleme me zemrën dhe në shtator i mbijetoi koronavirusit, të cilin e quajti sfidën më të rrezikshme të jetës së tij. Ai i është nënshtruar një operacioni të vështirë në zemër në 2016, dhe ka vuajtur po ashtu edhe nga kanceri i prostatës. Berluskoni e kaloi pjesën më të madhe të kohës së rekuperimit nga koronavirusi në shtëpinë e vajzës së tij Marina, në Provencë të francës juglindore.