Alarme për bomba janë lëshuar mëngjesin e të premtes në Serbi, një prej të cilëve në Qendrën Spitalore Klinike “Zvezdara” dhe Akademinë Mjekësore Ushtarake në Beograd. “Ekipet janë në terren në të dyja institucionet dhe gjithçka është nën kontroll”, tha ministria e brendshme serbe. Ndërkohë, edhe në Novi Sad policia evakuoi dhe ndaloi hyrjen në disa vende për shkak të raportimeve për bomba. Fakulteti i Shkencave Teknike, Institutet e Sremska Kamenicës, Stacioni Hekurudhor dhe Fakulteti Filozofik janë evakuuar. Mediat serbe shkruajnë se kërcënimet kanë mbërritur me email në adresat e mediave dhe shërbimeve kompetente, mëngjesin e të premtes nga i ashtuquajturi “Grupi Subversiv Mizantropik”.“Bombat janë të planifikuara për të shpërthyer sot, gjatë mëngjesit dhe pasdites së hershme,” thuhet në email. Ditët e fundit ka pasur raportime për mjete shpërthyese të vendosura në shkolla në Beograd, por edhe në vende të tjera në Serbi. Dy ditë më parë në adresat e 117 shkollave fillore dhe të mesme në beograd u dërgua një e-mail kërcënues, sipas të cilit në institucion ishte vendosur një bombë. Në e-mail thuhej gjithashtu se i gjithë beogradi do të hidhej në erë. Denoncimet deri më tani kanë rezultuar të rreme, por policia nuk ka mundur të bjerë në gjurmët e asnjë autori.