Edhe pse kryetarët shqiptarë të komunave me shumicë serbe në veri të Kosovës nuk u arrit të shkarkohen nga referendum, për Prishtinën zyrtare, janë përmbushur të gjitha kërkesat e ndërkombëtarëve ndaj Kosovës, e për ktë BE duhet të heqë sanksionet. Deklarata vjen nga qeveria Kurti, pas përfundimit të zgjedhjeve, nga ku për shkak të bojkotit nga Lista Serbe, n uk u arrit të shkarkoheshin kryetarët aktualë. “Me përfundimin e këtij procesi, pa marrë parasysh rezultatin, Republika e Kosovës ka përmbushur obligimin e saj ndaj qytetarëve të saj dhe përgjegjësinë e marrë nga dakordimi me Bashkimin Evropian për deeskalimin e situatës në veri të vendit. Andaj, pas votimit të djeshëm, është koha që masat e padrejta ndaj Kosovës përfundimisht të largohen”, thuhet në kumtesën e Qeverisë. Lidhur me këtë ka reaguar edhe Presidentja Vjosa Osmani, e cila do të marrë pjesë në mbledhjen e Këshillit të Sigurimit në OKB. Osmani thekson se Kosova i dha qytetarëve të komunave të veriut mundësinë që t’i largojnë kryetarët aktualë dhe t’i zgjedhin kryetarët e rinj, por qytetarët në masë të madhe nuk e shfrytëzuan këtë mundësi, duke akuzuar Beogradin për ndërhyrje. “Për fat të keq, kjo kryesisht ndodhi për shkak të presionit të Beogradit të ekzekutuar nga Lista Serbe dhe strukturat ilegale kriminale. Edhe njëherë, Serbia kreu ndërhyrje të paligjshme në një proces zgjedhor të një shteti tjetër. Edhe njëherë, Vuçiçi shkeli fjalën që ua kishte dhënë partnerëve ndërkombëtarë”, shkroi Presidentja në profilin e saj social. Ndërkohë Lista Serbe falënderon qytetarët që bojkotuan, duke akuzuar Kurtin se po frikëson serbët në veri.