Qeveria e Kosovës njoftoi se nëntë udhëtarët që u lënduan në një aksident në Serbi të një autobusi nga Kosova, janë jashtë rrezikut për jetë. Aksidenti i autobusit të linjës Prishtinë-Grac ka ndodhur rreth orës 22:00 në Kupci të Madh afër Krushevcit në Serbi. “Kompania e udhëtimit ka nisur një autobus tjetër që t’i marrë udhëtarët që të vazhdojnë udhëtimin për në Graz. Zyrtari ynë ndërlidhës është rrugës për në spitalin e Krushevcit për t’i vizituar të lënduarit”, tha Qeveria e Kosovës. Ekzekutivi tha se institucionet e Kosovës po bëjnë gjithçka për të ndihmuar të prekurit në këtë aksident. Njëri prej udhëtarëve që ndodhej në autobus tha se shkak për aksidentin kishte qenë rruga, e cila nuk ishte pastruar nga autoritetet serbe. Sipas tij, shoferi i autobusit nuk ka asnjë faj sepse nuk ishte duke ecur shpejt pasi edhe kushtet e rrugës nuk e lejonin një gjë të tillë. Udhëtari tha se autobusi ka qenë i mbushur plot, pa asnjë vend të lirë. Sipas tij, reagimi i organeve të rendit të shtetit serb ka qenë i shpejtë dhe një autobus tjetër ka mbërritur në vendin e aksidentit për ti transportuar pasagjerët. “Të gjithë kemi qenë duke fjetur në atë moment. Mes nesh ka pasur edhe fëmijë dhe një person me aftësi të kufizuara, por të gjithë jemi mobilizuar për t’i ndihmuar njëri-tjetrit dhe të gjithë jemi mirë”, deklaroi mes tjerash ai.