Konferenca e shumëpritur e Sigurisë në Munih nisi të premten mes reshjeve të borës dhe paqartësive nëse ky tubim do të çojë drejt një arritjeje diplomatike që do të cojë në dhënien fund të luftës së Rusisë në Ukrainë. Delegacioni amerikan udhëhiqet nga nënpresidenti JD Vance, i cili pritet të takohet me presidentin e Ukrainës, Volodymyr Zelensky, para se të mbajë fjalim në skenën kryesore. Ndërkohë, organizatorët e konferencës së mynihut, kanë konfirmuar tashmë se atje nuk ka asnjë delegacion rus, pavarësisht se Trump tha një ditë më parë se zyrtarët amerikanë dhe ata rusë do të takohen të premten në Munih dhe se Ukraina është e ftuar, gjithashtu. Edhe vetë Kievi ka thënë se nuk pret që në Munih të zhvillohen bisedime të tilla. Sidoqoftë, Munihu është mundësia e parë për shumë liderë evropianë për t’u takuar me zyrtarë të lartë nga administrata e re amerikane, përfshirë sekretarin e Shtetit, Marco Rubio, të dërguarin amerikan për Rusinë dhe Ukrainën, Keith Kellogg, dhe sekretarin e Mbrojtjes, Pete Hegseth. Hegseth tashmë ka shkaktuar tronditje gjatë një takimi të ministrave të NATO-s në Bruksel këtë javë, kur tha se Ukraina nuk mund të presë të rimarrë territorin e humbur nga pushtimi rus, e as t’i bashkohet NATO-s, në bazë të çfarëdo marrëveshjeje për paqe. Në mesin e reagimeve nga Evropa, disa analistë e përshkruan propozimin si parapërgatitje për një Marrëveshje të dytë të Munihut, duke iu referuar marrëveshjes së vitit 1938, në të cilën Britania dhe Franca iu nënshtruan kërkesave të Gjermanisë Naziste për pjesë të mëdha të Çekosllovakisë. Shefja e politikës së jashtme të Bashkimit Evropian, Kaja Kallas, foli këtë javë për “lëshime” ndaj Rusisë. Presidenti francez, Emmanuel Macron, paralajmëroi kundër “dorëzimit” para Rusisë. Ndërsa Hegseth tha në Bruksel se propozimet e SHBA-së “nuk janë tradhti”. Por, ai dha gjithashtu një mesazh të qartë se Evropa duhet të rrisë ndjeshëm shpenzimet për mbrojtjen, në vend që të vazhdojë të varet nga Amerika