Apeli i gjykatës së posaçme ka lënë në qeli Armand Marvataj, efektivin e policisë që dyshohet se përfitoi 10 mijë euro duke lejuar disa persona të merrnin naftën e bllokuar në Durrës. Marvataj kishte si detyrë të ruante anijen “AJAZANOBJA” me flamur të Tanzanisë, e cila u sekuestrua në datën 13 janar të vitit 2025, me 200 tonë naftë kontrabandë. Prokuroria e Posaçme tha se nxjerja e naftës është bërë në mes të ditës rreth orës 15.00 në datën 27 janar në Porto Romano, në kohën kur anija ishte ankoruar që prej sekuestrimit me vendim gjykate. Agjencia e Mbikqyrjes Policore dhe Policia e Durrësit, bënë rikëqyrje të anijes, përfshirë edhe pamjet filmike të kamerave të sigurisë në Porto Romano, të cilat kishin filmuar momentet e nxjerrjes së naftës, e cila u mor me tub përmes një pompe dhe u ngarkua në autobot. Nga ekspertimi i mostrave të marra në anije rezultoi se nafta ishte zëvendësuar me ujë.