Një marrëveshje bashkëpunimi e nënshkruar mes Turqisë dhe Maqedonisë së Veriut nuk është pritur mirë në Greqi, vecanërisht pjesa ku lihet i hapur edhe bashkëpunimi ushtarak mes dy vendeve. Ekspertët grekë të sigurisë e kanë konsideruar këtë marrëveshje si kërcënim për sigurinë e Greqisë. “Krahët e gjatë të Erdogan tashmë e kanë rrethuar Greqinë”, ishin titujt kryesorë të artikujve në mediat greke të këtyre ditëve. Përmbajtja e analizave ishte e njëjtë; Turqia ia doli mbanë të “rrethojë” Greqinë në të gjithë kufirin verior të saj me Bullgarinë, Maqedoninë e Veriut dhe Shqipërinë. Ekstremistët ndërkohë po përfitojnë për të siguruar kapital elektoral. Mihalis Pacikas nga partia “Grekët e Lirë”, që kundërshtoi marrëveshjen e Prespës kujtoi fjalët e thëna në atë periudhë nga Kryeministri Alexis Tsipras dhe ministri i Jashtëm, Nikos Kotsias. Dy ish-zyrtarët e deklaronin në atë kohës se kjo marrëveshje do të largonte Maqedoninë e Veriut nga kontrolli turk. Në atë kohë, Turqia dhuroi 7500 uniforma dhe mjete ushtarake për ushtrinë maqedonase dhe gjatë një vizite në Stamboll, ministri i Mbrojtjes i Maqedonisë së Veriut deklaronte se Turqia ishte një partner strategjik dhe mik i Shkupit. Pacikas thotë se dy aleatët e NATO-s të Greqisë janë nën ndikimin direkt të Erdoganit. Turqia po përdor shqiptarët në Maqedoninë e Veriut, Kosovë dhe Shqipëri. “Shqiptarët kanë lidhje të forta me Turqinë”, tha ai.