Presidenti Donald Trump u tha gazetarëve muajin e kaluar se avioni i dhuruar nga Katari mund të jetë gati për t’u përdorur si Air Force One në shkurt të vitit 2026, shumë përpara dorëzimit të vonuar prej kohësh të dy avionëve presidencialë të porositur tek Boeing përmes një procesi më tradicional blerjeje. “Ata thonë që do të jetë gati shkurt,” tha Trump në fund të korrikut, kur u pyet nga një gazetar se kur priste të fluturonte me avionin e ri. “Shumë më shpejt se të tjerët. Të tjerët janë ende duke u ndërtuar”. Por ish-zyrtarë të Mbrojtjes dhe analistë të aviacionit shprehin skepticizëm mbi realizimin e këtij afati kohor, duke përmendur nevojën për përmirësime të mëdha të avionit të një qeverie të huaj për të përmbushur kërkesat specifike të Air Force One dhe për të garantuar që avioni është i sigurt për të mbajtur në bord një president. Përtej shqetësimeve për afatin kohor nga një perspektivë e aviacionit, plani për të përdorur një Boeing 747-8 të dhuruar nga Katari ngre shumë pikëpyetje. Shumëkush është skeptik për ligjshmërinë dhe etikën e pranimit të një dhurate të tillë. Të tjerë janë të shqetësuar për kërcënimin ndaj sigurisë. Por Trump mbetet i palëkundur dhe vazhdon të projektojë optimizëm në lidhje me afatin kohor. Sidoqoftë, konvertimi i avionit luksoz që iu dhurua Trumpit në Air Force One mund të kushtojë qindra miliona dollarë. Zërat për zëvendësimin e avionëve të vjetër që përdoren nga presidenti, nisën vite më parë, nën ish-Presidentin Barack Obama. Në administratën e parë Trump u kalua një hap më tej duke nënshkruar një marrëveshje me Boeing për dy avionë të rinj presidencialë. Por ardhja e dhuratës nga familja mbretërore e Katarit ka shënuar një kthesë të cuditshme, e për disa ndoshta edhe shqetësuese.