Turqia hodhi poshtë të enjten deklaratat e ndërkombëtarëve mbi arrestimin e kryebashkiakut të Stambollit Ekrem Imamoglu dhe protestat mbarëkombëtare të që pasuan, që sipas saj janë "të paragjykuara" ndërkohë që autoritetet kanë bërë të ditur se janë arrestuar rreth 1900 persona në këto protesta. Imamoglu, rivali më i madh politik i Presidentit Recep Tajip Erdogan që udhëheq në disa sondazhe, u burgos në pritje të gjyqit për korrupsion të dielën. Arrestimi i tij shkaktoi protestat më të mëdha antiqeveritare në një dekadë dhe çoi në arrestime masive në të gjithë vendin. Partia Republikane Popullore (CHP) në opozitë, partitë e tjera opozitare, grupet e të drejtave të njeriut dhe vende perëndimore kanë thënë se procesi kundër kryebashkiakut, që është shkarkuar edhe nga detyra, është një përpjekje e politizuar për të eliminuar një kërcënim të mundshëm elektoral ndaj Erdoganit. Qeveria mohon çdo ndikim mbi gjyqësorin dhe thotë se gjykatat janë të pavarura. Duke folur me përfaqësuesit e medias ndërkombëtare në Stamboll, Ministri i Drejtësisë Yilmaz Tunc tha se Ankaraja u kishte kërkuar partnerëve të saj evropianë të reagonin me "mendje të hapur", duke shtuar se ashpërsia e akuzave kundër Imamoglu kërkon arrestimin e tij. “Ne nuk duam arrestimin e asnjë politikani, por nëse ka prova për shkelje atëherë kjo duhet të ndodhë”, tha Tunc. “Nëse shikojmë peshën e akuzave dhe pasi ekziston rreziku që provat të dëmtohen, gjyqësori ka marrë një vendim të arsyeshëm”, shtoi ai. Partia republikane popullore u ka bërë thirrje turqve të vazhdojnë protestat, duke thënë se do të organizojë mitingje dhe tubime në vende të ndryshme në Stamboll dhe qytete të tjera. Erdogan i ka cilësuar protestat si një "shoë" dhe paralajmëroi për pasoja ligjore për protestuesit. Ministri i Brendshëm Ali Yerlikaya tha se 1,879 persona ishin arrestuar që nga fillimi i protestave të mërkurën e kaluar ndërsa 150 policë janë lënduar në konfrontime.