Kosova dhe Serbia nuk bien dakord mes tyre për të zgjidhur problematikat që janë shfaqur mes dy vendeve. Të thirrur me urgjencë në Bruksel, Albin Kurti dhe Aleksandër Vuçiç nuk pranuan asnjë tërheqje në vendimet e tyre. Shefi i politikës së jashtme të Bashkimit Evropian, Josep Borrell, tha se Kosova dhe Serbia nuk arritën ndonjë marrëveshje për çështjen e targave, ndërsa tërhoqi vërejtjen për përgjegjësinë që u takon të dyja palëve për zhvillimet në terren. “Të dy mbajnë përgjegjësi të plotë për dështimin e bisedimeve dhe për çdo përshkallëzim dhe dhunë që mund të ndodhë në terren. Ne paraqitëm një propozim që presidenti Aleksander Vuçiç e pranoi, ndërsa kryeministri Albin Kurti jo”, tha ai. Pas pesë orë bisedimesh në Bruksel, presidenti i Serbisë, Aleksandar Vuçiç, tha se nuk është arritur asnjë marrëveshje me kryeministrin e Kosovës, Albin Kurti. Të dy udhëheqësit u takuan në Bruksel me ndërmjetësimin e Bashkimit Evropian, i cili ftoi në takimin emergjent për të diskutuar për tensionet ndërmjet të dy vendeve rreth situatës në Veriun e Kosovës. “Për arsye të paqarta, nuk kemi arritur absolutisht asnjë marrëveshje”, tha presidenti serb, duke paralajmëruar siç tha, ditë të vështira. “Do t’i dëgjojmë këshillat dhe kërkesat e përfaqësuesit të Lartë evropian, Josep Borrell. Ai ka kërkuar që ata të mos shqiptojnë gjoba dhe që ne mos të lëshojmë targa të reja të lëshuara nga Serbia, për të cilat ne kemi thënë se është në rregull. Ne do ta respektojmë këtë. Do të shohim se çfarë do të bëjë pala tjetër”, tha presidenti serb. Takimi ndodh në ditën kur ishte parashikuar të fillojë faza e dytë e zbatimit të vendimit të qeverisë së Kosovës për konvertimin e targave të makinave të lëshuara nga Serbia që duhet të përfundojë në prill të vitit të ardhshëm.