Më 5 qershor 1981, një rast i cuditshëm u konstatua në qendrën për kontrollin e sëmundjeve në SHBA. Pesë të rinj, gay, në los angeles, ishin diagnostikuar me një infeksion të pazakontë në mushkëri, të njohur si PCP, dhe dy prej tyre humbën jetën. E kjo ishte e para herë që sindroma e imuno-deficencës, ose sic njihet ndryshe AIDS, faza e avancuar shkatërrimtare e infektimit me virusin HIV që më vonë do të merrte 32 milionë jetë njerëzish në të gjithë globin, raportohej në shba. Disa ditë pas raporteve fillestare në gazeta, Qendra për kontrollin e sëmundjeve, konfirmoi edhe më shumë raste të tjera, në meshkuj gay. Kjo e shtunë, shënon kështu përvjetorin e 40 të raportimit të rasteve të para të AIDS-it në SHBA. Më shumë se 700 mijë njerëz në vend kanë humbur jetën nga sëmundja që atëherë. Edhe pse mjekësia ka avancuar duke ndryshuar në mënyrë drastike prognozën për pacientët me HIV/AIDS, ende sot nuk ka një kurë.