Presidenti amerikan, Joe Biden, shpalli të mërkurën një plan për financim më të madh të policisë, si përpjekje për të luftuar rritjen e numrit të vrasjeve. Ai tha se autoritetet në zonat e nxehta, mund të punësojnë më shumë forca policore. Strategjia e presidentit Biden për luftimin e krimit synon kufizimin e tregtarëve ilegalë të armëve dhe të trafikut të armëve të zjarrit. Qytetet e mëdha amerikane janë përballur me një rritje të vrasjeve dhe grabitjeve të armatosura, dhe presidenti paralajmëroi amerikanët se këto nivele mund të shënojnë rritje gjatë verës, pas disa muajsh bllokimi për shkak të pandemisë. Duke shpallur strategjinë e tij me pesë pika në Shtëpinë e Bardhë, të mërkurën më 23 qershor, presidenti u kërkoi qyteteve dhe shteteve të përdorin mjetet financiare me vlerë prej 350 miliardë dollarësh, që ishin caktuar për luftën me pandeminë e COVID-19. "Kjo do të thotë më shumë oficerë policie, më shumë infermierë, më shumë këshilltarë, më shumë punonjës socialë ose parandalues të dhunës në komunitet, për të ndihmuar në zgjidhjen e çështjeve, përpara se të përshkallëzohen në krime", tha presidenti. "Ne nuk po e ndryshojmë Kushtetutën, por po e zbatojmë atë", shtoi Biden. Kjo mbase ishte një përgjigje ndaj kritikëve republikanë, të cilët kanë thënë se përpjekjet e presidentit për kontrollin e armëve përbëjnë tejkalim të kompetencave kushtetuese.