Policia e Korçës ka vënë në pranga 3 persona të cilët u kapën duke transportuar përtej kufirit plot 22 emigrantë të paligjshëm kundrejt shpërblimit monetar. Operacioni u krye nga Specialistët për Hetimin e Trafiqeve të Paligjshme dhe Narkotikëve, në bashkëpunim me strukturat e SHÇBA, Policinë Kufitare dhe shërbimet e Komisariatit të Policisë Pogradec. Policia arrestoi në aksin rrugor Korçë-Pogradec, në afërsi të fshatit Grabovicë, një 39-vjeçar, i cili u kap duke transportuar me mjetin kamion tip "Benz", 16 emigrantë të paligjshëm. Nga veprimet hetimore policia dyshon se edhe dy shtetasit e tjerë të arrestuar, me iniciale E.T. dhe A.T., janë bashkëpunëtorët e 39-vjeçarit, pasi u kapën me mjetin tip "Audi", duke kryer mbikëqyrjen e rrugës. Në aksin rrugor Korçë-Pogradec, pranë fshatit Gështenjas, u konstatua mjeti tip "Opel", me drejtues një 20-vjeçar, të cilit shërbimet e policisë gjatë ndjekjes, i kanë bërë me shenjë të ndalonte, por ky shtetas është larguar me shpejtësi, duke mos iu bindur urdhrit të tyre dhe ka braktisur mjetin, me 6 emigrantë të paligjshëm, të cilëve iu kishte premtuar kalimin përtej kufijve, kundrejt shpërblimit prej 1200 eurosh. Ky shtetas është shpallur në kërkim dhe policia bën me dije se vijon puna për kapjen e tij. Te piketuarit në kuadër të operacuionit policor ‘erimetri’ akuzohen për “Ndihma për kalim të paligjshëm të kufijve" kryer në bashkëpunim dhe "Mosbindja ndaj urdhrit të punonjësit të policisë së rendit publik".