Të tjera detaje kanë dalë në dritë pas aksioneve të Policisë të kryera në veri të Kosovës këtë të martë. Policia dhe Prokuroria e Kosovës, kanë bërë me dije se operacioni policor është zhvilluar në 21 pika vendodhjesh në Mitrovicë, Vushtri, Skënderaj dhe Leposaviç. Policia bën me dije se gjatë operacionit janë arrestuar 16 persona për kryerjen e veprave penale ‘detyrim’ si dhe ‘importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse’. Në mesin e të arrestuarve është edhe një zyrtar policor i Zveçanit i cili tashmë është pezulluar. Hetimet sipas policisë kanë zgjatur për disa muaj. Autoritetet kanë sekuestruar gjatë operacionit 9 armë zjarri, 200 fishekë, municione të ndryshme, 15 telefona mobilë, 2 palë pranga, thikë, tyta të armës, fatrolla për armë dhe 1 DVR. Pas intervistimit lidhur me rastin, me vendim të prokurorit, 13 persona do të ndalohen për 48 orë.