Barrikadat e vendosura në veri të kosovës, prej 11 ditësh qëndrojnë në këmbë, duke vështirësuar jetën e banorëve të kësaj pjese të vendit ndërkohë që rrugët që cojnë në pikat e kalimit kufitar të Jarinjës dhe Bërnjakut, mbeten të bllokuara. Serbët lokalë kanë ngritur së fundmi edhe një tjetër barrikadë në "Kroin e Vitakut", nga Mitrovica në drejtim të Zvecanit, duke çuar kështu numrin e barrikadave në nëntë. Dyqanet janë hapur ndërkohë që edhe në shkolla e fakultete ka rinisur mësimi. Vihet re ndërkohë në rajon një prani e shtuar e pjesëtarëve të KFOR-it. Pjesëtarët e Policisë së Kosovës në anën tjetër, vazhdojnë patrullimin e tyre nëpër zonat me popullatë të përzier në veri të Mitrovicës, duke ofruar rend dhe siguri atje. Ndërkohë, presidentja Vjosa Osmani ka pritur në takim komandantin e Kfor-it, Angelo Michele Ristuccia por zyra e presidencës nuk ka dhënë më shumë detaje. Thjeshtë është thënë në një deklaratë për shtyp se të dy ata kanë biseduar për situatën e sigurisë në vend. Më herët, kryeministri i Kosovës, Albin Kurti ka bërë të ditur se pret që KFOR-i të largojë barrikadat në veri, duke mundësuar kështu sërish lëvizjen e lirë të qytetarëve, por se misioni i NATO-s në Kosovë ka kërkuar pak kohë për ta bërë këtë.