Së paku dhjetë civilë u vranë në dy shpërthime në pjesën perëndimore të Kabulit, thanë zyrtarët afganë të sigurisë. Katërmbëdhjetë të tjerë u plagosën në disa shpërthime të tjera, që goditën dy minibusë, tha zëdhënësi i policisë së Kabulit. Deri tani, përgjegjësinë për sulmet nuk e ka marrë asnjë grup. Por sic dihet, në Afganistan janë aktivë si talibanët, ashtu edhe militantët e grupit ‘Shteti Islamik’. Në fillim të muajit maj, Shtetet e Bashkuara kanë nisur t’i tërheqin trupat e veta nga Afganistani, pas 20 vjetësh luftë. Komanda Qendrore amerikane tha të martën se tërheqja është “përmbushur në masën 30-44%” dhe se gjashtë objekte u janë dorëzuar forcave afgane të sigurisë. Në ditët dhe javët në vazhdim autoritetet afgane do të marrin në dorë një numër bazash të tjera. Presidenti Joe Biden njoftoi në prill se të gjitha forcat amerikane do të jenë larguar plotësisht nga Afganistani në fillim të shtatorit, duke i dhënë fund një angazhimi 20 vjeçar për të luftuar talebanët dhe al-Qaedën. Deri më 11 shtator pritet të tërhiqen të gjitha trupat amerikane, si edhe forcat e tjera të NATO-s, të pranishme në Afganistan. Kjo ka rritur shqetësimet e vëzhguesve nëse Qeveria afgane mund t’ia dalë e vetme në luftën kundër talibanëve dhe grupeve të tjera militante.