“Serbia do të kërkojë sërish kthimin e ushtrisë së saj në Kosovë, dhe për këtë ka mbështetjen e Moskës”, ka qenë kjo deklarata e ambasadorit rus në OKB, Vassily Nebenzia për situatën mes dy shteteve të Ballkanit. Sipas diplomatit rus, Serbia do të kërkojë rikthimin e rreth 1 mijë ushtarëve e policëve në Kosovë, kërkesë e bërë në vitin 2022 nga presidenti Aleksandër Vuçiç, por që u refuzua nga NATO. Sipas Nebenzias kjo kërkesë është në përputhje me Rezolutën 1244. Për diplomatin, kjo lëvizje e Serbisë është e arsyeshme, pasi sipas tij edhe NATO po armatos edhe më shumë Prishtinën. Diplomati shtoi më tej se brenda tre viteve Prishtina pritet të vërë në përdorim mbi 350 automjete të blinduara dhe të blejë flotën e saj të helikopterëve ushtarakë. Sipas mediave të huaja, vendosja e ushtrisë serbe në Kosovë, do të shërbente për të siguruar objektet e trashëgimisë kulturore serbe atje, të cilët ruhen nga ushtarët e KFOR.