Parlamenti Evropian dhe Këshilli Evropian kanë arritur të enjten një marrëveshje për përdorimin e mjeteve nga buxheti i BE-së për të ndihmuar vendet në procesin e zgjerimit. Bëhet fjalë për programin IPA 3 nga i cili për këto shtete në shtatë vitet e ardhshme do të vihen në dispozicion 14.2 miliardë euro. Këto mjete do të ndahen për Turqinë dhe vendet e Ballkanit Perëndimor: Shqipërinë, Bosnje-Hercegovinën, Kosovën, Malin e Zi, Maqedoninë e Veriut dhe Serbinë. Risi në këtë marrëveshje është se kjo ndihmë do të jetë e kushtëzuar me sundimin e ligjit dhe respektimin e vlerave demokratike në vendet kandidate. BE do të ketë mundësi edhe të pezullojë ndihmën për këto shtete në rast se do të ketë përkeqësim të situatës në sundimin e ligjit dhe ecje prapa në zhvillimin e demokracisë. Nga viti 2021 deri në 2027 ndihmat do të përdoren për zbatimin e reformave institucionale, ekonomike, sociale. Këto reforma do të ndihmojnë vendet e rajonit të Ballkanit Perëndimor dhe Turqinë që të avancojnë drejt arritjes së standardeve evropiane dhe rritjes së sigurisë së përbashkët. Ndonëse fokus kësaj radhe i jepet edhe çështjeve që kanë të bëjnë me migracionin, në KE kanë sqaruar se mjetet financiare që i janë caktuar Turqisë për t’u përballur me sfidat e migracionit, nuk janë nga instrumentet e IPA-s por nga linjat e tjera buxhetore të Bashkimit Evropian. Parlamenti Evropian ka nënvizuar se është e rëndësishme të ketë një qasje strategjike dhe të mbahet kushti i pezullimit të ndihmës për shtetet që nuk do të respektojnë vlerat e përbashkëta evropiane, sidomos ato që kanë të bëjnë me liritë themelore, demokracinë dhe lirinë e mediave. Fokus i veçantë do t’i jepet edhe ruajtjes së mjedisit. Kryetari i Komisionit për politikën e jashtme David McAllister, duke komentuar arritjen e marrëveshjes, tha se “është një lajm i jashtëzakonshëm për shfrytëzuesit e instrumenteve të IPA 3, pasi është arritur një marrëveshje e shumëpritur.” Mjetet financiare nga të ashtuquajturat “instrumentet e para-anëtarësimit” (IPA) pritet të ndihmojnë që vendet e Ballkanit Perëndimor të rrisin edhe tërheqjen e investimeve private. Këtë BE do ta ndihmojë edhe përmes një kornize të posaçme për tërheqjen e investimeve në Ballkanin Perëndimor të prezantuar vitin e kaluar.