Autoritetet polake kishin nxjerrë ushtrinë sot për të ndaluar kalimin e disa qindra emigrantëve të mbledhur në pikën kufitare të Kuznica me Bjellorusinë. Prej disa muajsh, emigrantët që besohet se po inkurajohen nga qeveria e Alexander Lukashenko, përpiqen të kalojnë ilegalisht kufirin drejt BE. Polonia ka mobilizuar ushtrinë territoriale për të mbrojtur kufirin teksa grupi që tenton të hyjë në BE rrezikon përplasje të dhunshme. Trupa ushtarake shiheshin sot në të dyja anët e kufirit, teksa situata humanitare dhe ajo e rendit rrezikon të dalë jashtë kontrollit. Ministri i jashtëm i Polonisë tha se Bjellorusia po tenton të provokojë “një incident madhor, mundësisht me të shtëna e të plagosur”. Në pamjet e rënda të postuara në rrjetet sociale shihej karvani i madh i njerëzve që ecte në autostradën drejt kufirit. Një ministër polak tha se janë rreth 12,000 ushtarë që po i presin turmat në kufi. Në pamje njerëzit shiheshin që kalonin gardhet e para ndarëse mes dy vendeve fqinje. Zhvillimi vjen mes përkeqësimit të situatës në kufijtë e Evropës dhe të marrëdhënieve të unionit me Bjellorusinë.