Donald Trump inauguroi të martën fushën e tij të re të golfit në lindje të Skocisë, duke përmbyllur një vizitë pesëditore në të cilën presidenti amerikan nënshkroi një marrëveshje të madhe tregtare dhe u shpreh mbi disa çështje kyçe. Agjentë sekretë dhe golfistë kalonin nëpër kompleksin e gjerë përgjatë bregut të Aberdeenshire, duke pritur që presidenti të fillonte lojën. Por presidenti republikan, një golfist i apasionuar, lejoi që djali i tij Eric të hapte zyrtarisht fushën, pasi kishte transferuar pronat dhe asetet e tij në një kompani familjare. Fusha e re ka bunker-in natyral më të madh në botë, rëra dhe gjelberime që shtrihen drejt detit, me një "fokus mbi ndjeshmërinë ndaj mjedisit", tha një komunikatë për shtyp. Në det shtrihen turbinat e erës që Trump kishte tentuar pa sukses t’i bllokonte. Presidenti përsëri u shpreh kundër energjisë nga era kur mikpriti të dielën presidenten e Bashkimit Evropian Ursula von der Leyen dhe të hënën kryeministrin britanik Keir Starmer. Trump luajti golf në Turnberry të shtunën dhe të dielën gjatë një vizite që përzien argëtimin me diplomacinë.