Situata e trafikut të rënduar që shoqëron të gjithë aksin nacional Qafë Thanë Elbasan vijon edhe pasditen e 3 janarit. Kthimi në normalitet pas pushimeve të fundvitit vijon të krijojë trafik në rrugët që lidhin juglindjen me pjesën tjetër të vendit. Një pjesë e mirë e qytetarëve të Tiranës, por edhe të qyteteve të tjera kanë zgjedhur t’i kalojnë festat në Korçë, Pogradec, apo edhe në vendet fqinje si Greqi e Maqedoni. E ndërkaq kthimi është shoqëruar me vonesa të mëdha në rrugë. Po ashtu tashmë rëndesë në lëvizje ka edhe drejtimi I kundërt, prej Elbasanit në drejtim të Qafë Thanës e më tej në Kapshtices të emigrantëve që largohen pasi kaluan festat në vendin e tyre. Ndërkohë shërbimet e Policisë Rrugore kanë kaluar në gatishmëri të shtuar kryesisht në akset "Qafë Tanë-Elbasan dhe "Rrogozhinë-Elbasan". Policia në një apel publik u bëri thirrje drejtuesve të mjeteve të tregojnë durim, të mos kryejnë parakalime të gabuara të cilat më pas shoqërohen me paralizim të trafikut. Aksi rrugor Elbasan Qafë Thanë, pjesë e Koridorit VIII, në ditë normale përballon një fluks lëvizje 10-15 mijë mjete në ditë, ndërsa ky numër dyfishohet në festa. Për këtë arsye tashmë ka nisur investimi për zgjerimin e kësaj rruge. Aktualisht edhe në datën 3 janar kompania i është rikthyer punës dhe po punohet në veprat e artit dhe mbrojtjen lumore. Problemi i ngarkesës së trafikut në segmentin më të ngarkuar në qendër të Shqipërisë, pritet të marrë zgjidhje përfundimtare kur të nisë investimi edhe për BY Pass e Elbasanit.