Ministri rus i mbrojtjes Sergei Shoigu njofton se Moska do të ndërtojë baza të reja ushtarake si kundërpërgjigje të zgjerimit të aleancës së NATO. "Deri në fund të vitit, 12 njësi e divizione ushtarake do të shtohen në Distriktin Perëndimor”, tha Shoigu duke e quajtur zhvillimin "kundërmasë e përshtatshme" për aplikimin e Finlandës e Suedisë në NATO. Fushata ushtarake e Moskës tronditi Suedinë dhe Finlandën, të cilat pas shumë dekadash paanshmërie, vendosën të aplikonin për t’u anëtarësuar në NATO. Procesi i pranimit pritet të zgjasë dy javë, ndërkaq ratifikimi në parlamentet e 30 shteteve anëtare deri në një vit, thonë diplomatët. Pavarësisht se procesi i pranimit pritet të marrë kohë disa javë, presidenti i Turqisë, Rexhep Tajip Erdogan, kundërshton anëtarësimet. Nëse tejkalohen shqetësimet që ka Turqia dhe nisin bisedimet e anëtarësimit, atëherë këto dy shtete mund të bëhen anëtare brenda pak muajsh.