Nuk ka rëndësi vetëm çfarë hamë, por edhe si e perceptojmë ushqimin. Sipas studiuesve, mënyra si mendojmë për ushqimin ndikon drejtpërdrejt në ndjesinë e urisë dhe ngopjes. Edhe pse shumica e njerëzve e dinë se duhet të zgjedhin opsione më të shëndetshme, tundimi i ushqimeve të shijshme dhe me shumë kalori është i fortë. Kjo lidhet edhe me faktin se trupi ynë është “programuar” të kërkojë energji të shpejtë, ndërsa sot jemi të rrethuar nga ushqime të përpunuara që e bëjnë këtë edhe më të vështirë. Studimet tregojnë se pritshmëritë tona ndikojnë në reagimin e trupit. Në një eksperiment, pjesëmarrësit pinin të njëjtin milkshake, por ata që besonin se ishte i pasur në kalori ndiheshin më të ngopur sesa ata që mendonin se ishte “dietik”. Pra, mendja luan rol kyç në mënyrën si funksionon trupi. Edhe etiketimi i ushqimit ka ndikim. Kur një produkt prezantohet si “i shëndetshëm”, njerëzit shpesh ndihen më pak të kënaqur dhe priren të hanë më shumë më pas. Ndërsa kur ushqimi lidhet me kënaqësi, ndjesia e ngopjes rritet. Ekspertët sugjerojnë që kufizimi i tepërt mund të jetë kundërproduktiv. Në vend të ndalimeve strikte, këshillohet një qasje më e balancuar, të konsumohen ushqime të shëndetshme, por pa përjashtuar plotësisht kënaqësitë e vogla. Të hash herë pas here diçka të shijshme dhe ta shijosh pa ndjenja faji, mund të ndihmojë më shumë në mbajtjen e një peshe të shëndetshme sesa dietat e ashpra, shkruan BBC