Stacioni televiziv rus VGTR shfaqte sot pamje të emigrantëve të bllokuar në zonat pranë kufirit Poloni-Bjellorusi. Rreth 2,000 emigrantë kryesisht kurdë nga Lindja e Mesme, qëndrojnë prej ditësh të bllokuar në temperatura thuajse zero. Evropa akuzon Kremlinin se po nis një “luftë hibride” duke përdorur emigrantë të huaj për të krijuar kaos në kufijtë e BE. Kremlini gjithashtu ka mohuar akuzat e BE për nxitje të krizës teksa zëdhënësi Dmitry Peskov i quajti ato provokime. “Ne jemi vetem vigjilente per ato qe ndodhin ne afersi te kufijve tane”, tha Peskov. Aktivitet i shtuar ushtarak është parë prej disa ditësh në zonë, nga të dyja palët e vendeve kufitare. Ushtarë rusë kanë ardhur në rajon në ndihmë të forcave bjelloruse për të ruajtur kontrollin e situatës dhe disa manovra të përbashkëta ushtarake Rusi-Bjellorusi po kryen aty. Nga ana tjetër, njësi të forcave të vendeve evropiane të NATOs kanë ardhur pranë kufirit polak, për ndihmë ndaj trupave vendase dhe mirëmbajtje të gardheve ndarëse kufitare.