Gjashtë vende perëndimore bënë thirrje për një takim të Këshillit të Sigurimit të OKB-së për Ukrainën përpara një votimi të pritshëm të premten mbi një rezolutë humanitare ruse, e cila nuk përmend përgjegjësinë e saj për luftën kundër fqinjit të saj më të vogël.“Rusia po kryen krime lufte dhe po vë në shënjestër civilët. Lufta e paligjshme e Rusisë ndaj Ukrainës është një kërcënim për të gjithë ne”, shkroi në Tëitter përfaqësuesi i Britanisë në OKB, një nga vendet që kërkuan takimin.Në mesazhin e postuar në Twitter, të cituar nga VOA, thuhet se takimin po e kërkojnë edhe Shtetet e Bashkuara, Shqipëria, Franca, Irlanda e Norvegjia, të gjitha ato anëtarë të Këshillit të Sigurimit. Kërkesa është që takimi të mbahet pasditen e sotme, por koha e tij nuk është përcaktuar ende zyrtarisht.Rusia qarkulloi të martën propozimin për një rezolutë të Këshillit të Sigurimit që kërkon mbrojtje për civilët “në situata kur ata janë të cënuar” në Ukrainë dhe kalim të sigurt për ndihmat humanitare dhe njerëzit që kërkojnë të largohen nga vendi, por aty nuk përmendet asnjëherë lufta. Projekt-rezoluta nënvizon nevojën që "palët e interesuara" të bien dakord për pauzat humanitare për të evakuuar me shpejtësi "të gjithë civilët", megjithatë asnjëherë nuk i identifikon palët ndërluftuese.