Katër vjet nga hapja e pikës kufitare Bellanoc-Stançic, tabelat kufitare atje tani kanë vetëm mbishkrime në maqedonisht. Edhe pse një zonë kufitare me vendbanime qind për qind shqiptare, gjuha shqipe në këto tabela mungon raporton agjensia e lajmeve INA. “Maqedonia e Veriut ka hequr gjuhën shqipe në tabelat e sinjalistikës rrugore. Tani tabelat në afërsi të të vendkalimit kufitar Bllacë, kanë vetëm tri mbishkrime: gjuhën maqedonase, anglisht dhe frengjisht”, pretendon Shkodran Tolaj, ish-Drejtori i Ansamblit Shtetëror Shqiptar të Këngëve dhe Valleve Popullore në Maqedoninë e Veriut, i cili me anë të një postimi në Facebook ka denoncuar heqjen e gjuhës shqipe nga tabelat e rrugëve. “MOS NA E KUJTONI BLLACËN E VITIT 1999. Në Bllacë, në kufi me Kosovën, mbishkrimet e reja në maqedonisht, anglisht dhe frengjisht. Në shqip JO. U kthyem në vitet e rënda kur baballarët tonë nuk guxonin të flisnin shqip në shkollë”, ka shkruar ai, teksa thekson më tej se tabelat në maqedonisht, që shoqërohen vetëm me shkrime në anglisht dhe frengjisht, janë vënë nga Ndërmarrja Publike “Rrugët Shtetërore”, e cila, sic shprehet ai, ka nisur të heqë shqipen në rrugët që menaxhon kjo ndërmarrje. Kryetari i Gjykatës Kushtetuese maqedonase, Darko Kostadinovski ka caktuar sakaq një mbledhje ku do të shqyrtohet mundësia e shfuqizimit të tre neneve të gjuhës shqipe nga Ligji për zbatimin e gjuhëve.