Paneli Zgjedhor për Ankesa dhe Parashtresa ka refuzuar ankesat e dy kandidatëve për deputetë të Partisë Demokratike të Kosovës të cilët kërkuan rinumërim të plotë të votave të kandidatëve të kësaj partie. Bekim Haxhiu dhe Qëndrim Kryeziu u ankuan se janë dëmtuar në numrin e votave gjatë numërimit fillestar. Haxhiu përmes ankesës së tij ka ngritur dyshime se është dëmtuar deri në gjashtë vota dhe se diferenca me deputetin që në renditje është më lartë se ai është 102 vota ka kërkuar rinumërim të plotë, me arsyetimin se diferenca është e ngushtë dhe se mund të jetë vendimtare se kush fiton ulëse. PZAP-ja ankesën e Haxhiut e ka rrezuar si të pabazuar sepse konsideron se gjatë rinumërimit “një numër kandidatësh minimalisht kanë fituar vota ndërsa kandidatë të tjerë po ashtu ne mënyrë minimale kanë humbur disa vota”. Sipas PZAP-së, këto janë korrigjime dhe nuk bëhet fjalë për model sistematik të pasaktësive. Qëndrim Kryeziu po ashtu kishte kërkesën e njëjtë të rinumërimit të plotë të votave brenda PDK-së, e ishte ankuar se është dëmtuar me 589 vota gjatë numërimit fillestar dhe se i ishin shtuar gjatë rinumërimit. Por, ankesën e tij e hodhi poshtë Paneli Zgjedhor për Ankesa dhe Parashtresa duke thënë që gjatë rinumërimit është evidentuar se Kryeziu ka dy vota më pak e jo 589 më shumë. Pas këtij vendimi të PZAP-së, dy kandidatët kanë kohë 48 orë të ankohen në Gjykatën Supreme. Nëse nuk e bëjnë këtë, atëherë Komisioni Qendror i Zgjedhjeve mund të shpallë rezultatin përfundimtar të zgjedhjeve të 7 qershorit. "Pas plotfuqishmërisë së vendimeve, mbetet të shihet nëse ato përmbajnë obligime konkrete për KQZ-në, për t'i zbatuar dhe pastaj për të proceduar me aktin e shpalljes së rezultateve përfundimtare", tha të hënën Valmir Elezi nga Komisioni Qendror i Zgjedhje duke shtuar se ky institucion është në pritje të përfundimit të afatit ligjor të ankesave. Lëvizja Vetëvendosje doli fituese e zgjedhjeve duke siguruar 53 mandate në Kuvend, e pasuar nga Partia Demokratike e Kosovës me 22, Lidhja Demokratike e Kosovës me 18 dhe Aleanca me 7. 20 ulëse janë të garantuara për pakicat.