Pa humbur kohë, një ditë pas masave të u prezantuan nga presidenti i Aleksander Vucic, qeveria e Serbisë i ka miratuar ato, duke urdhëruar zbatimin e tyre. Pas mbledhjes së qeverisë, kryeministri serb, Millosh Vuçevic, urdhëroi ministritë të marrin masa por edhe të zhvillojnë aktivitete për mbrojtjen ligjore dhe socio-ekonomike të serbëve në Kosovë, por edhe të interesave kombëtare të Serbisë. Këto masa përfshijnë, kthimin e gjendjes para vendimeve të njëanshme të Qeverisë së Kosovës, shpalljen e Kosovës si zonë nën mbrojtje të posaçme sociale, përforcimin e mëtejashëm të institucioneve serbe në Kosovë dhe që të mos lejohet mbyllja e tyre. Më 13 shtator presidenti serb Aleksandar Vuçiç kërkoi shpalljen e zgjedhjeve të reja lokale në veri të Kosovës, kthimin e serbëve në Policinë e Kosovës dhe gjyqësor, si dhe tërheqjen e njësive speciale të Policisë së Kosovës nga rajoni i veriut. Sipas njoftimit të Qeverisë serbe, Vuçevic deklaroi se kërkesa do t’i dërgohet Kuvendit serb për të shpallur të paligjshme të gjitha veprimet që janë në kundërshtim me marrëveshjet ndërmjet palëve negociuese, që nga shpallja e pavarësisë së Kosovës. Kryediplomatja e Kosovës, Donika Gërvalla ka reaguar duke ftuar faktorin ndërkombëtar të dënojë vendimin e qeverisë së Serbisë, Ajo tha se Serbia po kërkon të destabilizojë Kosovën dhe se Vuçiç “nuk e ka ndër mend të ndalë instrumentalizimin e serbëve të Kosovës dhe interesave të tyre, duke i shfrytëzuar për politikë ditore dhe përfitime financiare”. Tensionet e reja mes Kosovës dhe Serbisë vijnë pasi autoritetet në Kosovë javëve të fundit kanë mbyllur disa institucione paralele serbe, të cilat i konsiderojnë jokushtetuese dhe të paligjshme. Beogradi i ka cilësuar këto veprime si “akte kriminale” që synojnë “dëbimin e serbëve”, ndërsa përaqësuesit ndërkombëtarë kanë kritikuar gjithashtu Kosovën.