Më të dashurit e publikut, personazhet që çdo të dielë mbajnë të mbërthyer para ekranit mijëra shqiptarë me humorin dhe batutat e tyre, zbritën në Gjirokastër në kuadër të turit veror “Verë dhe Portokalle”. Sheshi “Çerçiz Topulli” u mbush me qindra qytetarë, turistë dhe familje, të cilët shijuan nga afër spektaklin e aktorëve të humorit të Top Channel. Të qeshurat, duartrokitjet dhe atmosfera festive shoqëruan çdo skeç, ndërsa artistët sollën në skenë personazhet më të dashur dhe interpretimet që i kanë kthyer në ikonat e humorit shqiptar. Energjia e publikut dhe e aktorëve krijoi një mbrëmje magjike në zemër të qytetit të gurtë, ku humori u kthye në protagonisti kryesor i natës. Turi “Verë dhe Portokalle” vijon rrugëtimin në qytete të ndryshme të vendit. Mbrëmjen e 31 korrikut, spektakli do të ndalet në Tepelenë, ku banorët e qytetit dhe të gjithë zonave përreth do të kenë mundësinë të përjetojnë nga afër një tjetër natë plot humor, emocione dhe argëtim.