Policia në Nikaraguan ka bastisur sot shtëpinë e krye-opozitares Cristiana Chamorro, njoftoi asistentja e saj, pasi gjykata lëshoi urdhrin e arrestit prej pretendimeve të “pastrimit të parave” të bëra nga qeveria e presidentit Daniel Ortega. Zhvillimi është një përshkallëzim i betejës politike për zgjedhjet që zhvillohen më vonë gjatë këtij viti. Vëllai i saj Fernando Chamorro, drejtues i rrjetit të pavarur informativ Confidencial, konfirmoi se e motra është arrestuar. Në pamjet e shpërndara në media shiheshin oficerët e policisë që hynin e rrethonin shtëpinë e Chamorro në kryeqytetin Managua, teksa disa oficerë largonin me forcë gazetarët që vinin për të dokumentuar skenat. Gazetarja 67-vjeçare nuk ka parti politike por konsiderohet sfiduesja më serioze e presidentit Daniel Ortega në zgjedhjet e nëntorit, edhe pse ky i fundit nuk ka konfirmuar se do të kandidojë për një mandat të katërt.