Komisioni Qendror i Zgjedhjeve nën monitorimin e anëtarëve të KAS nisi rinumërimin e votave për qarkun e Fierit. Në total janë 587 kuti votimi për t’u numëruar. Sipas të dhënave të reflektuara në faqen online të KQZ në 97 kuti të numëruara deri më tani Partisë Demokratike i janë shtuar 20 vota ndërsa PS 7. Ndërsa Koalicionit Nisma Shqipëria Bëhet inicuese e kërkesës për rinumërimin e qarkut fier, i janë shtuar 2 vota. Social Demokratëve të Tom Doshit i janë hequr 3 vota ndërsa dy vota i janë hequr Partisë Aleanca. Për votën preferenciale deri më tani nga demokratët ka rezultuar se është mbajtur me hatër Arben Cuko duke i shtuar padrejtësisht 25 vota pasuar nga Ledion Cala me 19 më shumë se çfarë i takonin. Rinumërimi i ka ardhur në ndihmë kandidatit socialist Klevis Jahas të cilit komisionerët i kishin hequr 61 vota pasuar nga Elton Korreshi 42 vota. Përparim Arapi një tjetër kandidat socialist kishte marrë 42 vota plus që nuk i takonin. E famshmja kandidate socialiste e Fierit Zegjine Caushi e cila e fitoi mandatin për vetëm 61 vota deri më tani i është hequr vetëm 1 votë. Kërkesa për rinumërimin e Fierit ishte e koalicionit Nisma Shqipëria Bëhet e Adriatik Lapajt, i cili pretendon një mandat, për t’ja marrë Partisë Socialiste. E që kjo të ndodhë i duhen 517 vota të cilat deri më tani nga kutitë e rinumëruara duket një mision i vështirë.