Autoritetet italiane e kanë pohuar këtë me kohë, por tani edhe BE-ja u bind se kontrolli i ujërave të zeza është metodë e besueshme për sigurimin e informacionit në përhapjen e virusit. Komisioneri i Mjedisit, Virginijus Sinkevicius tha se shtetet anëtare duhet të analizojnë sistematikisht ujërat e zeza për të parandaluar pandeminë e koronavirusit. "Monitorimi i ujërave të zeza mund të jetë një burim i lirë, i shpejtë dhe i besueshëm informacioni rreth përhapjes së virusit dhe varianteve të tij në popullatë," pohoi ai për gazetën "Welt am Sonntag", duke shtuar se të 27 shtetet e bllokut duhet të "krijojnë sisteme efektive për monitorimin e ujërave të zeza sa më shpejt të jetë e mundur". Kjo mund të bëhet maksimumi brenda prej gjashtë muajve. Kontrolli i ujërave të zeza është "një koncept i provuar dhe i testuar për mbikëqyrjen e shëndetit publik". Një sërë qytetesh të mëdha si Barcelona, kanë përdorur kampionë të ujrave të zeza për të llogaritur sasinë dhe llojin e konsumit të drogave. Tani mendohet se analiza e ujërave të ndotura mund të përdoret jo vetëm si sistem paralajmërimi i hershëm, por edhe për të verifikuar situatën aktuale të Covid 19. Kështu sipas ekspertëve, nëse në ujërat e zeza nuk zbulohen gjurmë të virusit, ky mund të jetë një tregues se në zonat e shqyrtuara rreziku duhet të jetë më i ulët.”